The Magic Of Love (TMOL Komedi) (Part 5)

(Photo Credit: hqwallbase)
(Photo Credit:  hqwallbase)
(Photo Credit: hqwallbase)

“Paint my love…you should paint my loveeeee…”  napakanta sa kilig si Kulaspira.

Naputol ang kanyang pag-awit nang bigla niyang malimutan ang liriko ng kanta. Mga ilang metro na lang, abot tanaw na niya ang bahay kubo nila, kaya, binilisan na niya ang paglakad.

Samantala… si David ay masayang nakipagkuwentuhan sa mga namili ng kanyang paninda. Magiliw ang lalaki na nakipagbiruan sa taga baryo Putik-Putik.

“Thank you, tisoy!” kindat ni Kotkot.

“You’re welcome! So see you all next time!” paalam ni David.

Sakto rin ang dating ni Bakang nang itulak ni David ang kariton. Napangiti nang malaki ang lalaki nang makita ang kaibigan ni Kulaspira.

“Where is Khulasha?” tanong ni David.

“She make wewee!” sagot ng dalaga.

“What?” tanong ng lalaki.

“Don’t ask too much! Just me and Kulasa knows, ok?” pinandilatan niya ng mata si David.

“Here is the money of the mhalungguy and ohkarha, sold out!” sabay abot kay Bakang.

“200 pesos? Huwaw! I like you, brother!” wika ni Bakang sabay hampas sa braso ng lalaki.

“So, where is she?” tanong ni David.

“Why you doing this to Kulasa?” seryosong tanong ni Bakang.

“Because I love her! The first time I saw her, I know she’s the one! Please, help me!” pagmamakaawa ni David.

Napaismid si Bakang, pero nakita niya ang katapatan sa sinabi ng lalaki. Kung ito na ang lalaking para sa kaibigan niya ay isa siya sa tatalon sa tuwa.

“You want to come with me?” paanyaya ni Bakang.

“Where?” takang tanong ni David.

“Of course, to rape you! Hahahaha just kidding, brother! You’re not my type at all! Let’s go, we go to Kulasa house,” natatawang sabi ni Bakang.

“Hahaha! Sure and thank you so much!” masayang sagot ng lalaki.

“Peste talaga, ang gwapo ng gago!” sa isip ni Bakang.

Masayang itinulak ni David ang kariton at nakasakay naman sa loob si Bakang na tila isang anghel na walang pakpak na may pakaway-kaway pang nalalaman.

“The Miss Putik-Putik Bakang Singkit!” sigaw niya habang nakaupo sa loob ng kariton.

Sa bahay nina Kulaspira; nakaupo sa bangkong kawayan ang matanda at pinagmamasdan ang naliligong apo sa balon.

“La Basyang, naniwala ka po ba sa Lab at first sight?” tanong ni Kulaspira.

“H’wag mo akong inglisin na bata ka!” angal ni Lola Basyang.

“Sus, praktis lang po! ‘Yun sa unang tingin, nakadama ka na ng pag-ibig? May ganun po ba?” seryosong tanong ni Kulaspira.

“Ano bang tanong ‘yan! Kulasa, ang unang tingin ay paghanga at kalaunan dun mo madarama ang salitang pag-ibig. Hindi sa isang segundo na nakita mo siya ay ayun na, umibig ka na! Hindi ganoon, Kulasa. Ang paghanga na naramdaman mo ang magdadala sa iyo sa mundo ng pag-ibig!” paliwanag ni Lola Basyang.

“Ah, ganun po ba! Parang magic o gayuma ba, Lola?” tanong ulit ng dalaga.

“Hindi gayuma Kulasa! Dahil ang tunay na pag-ibig ay hindi kumukupas, hindi nawawala kahit anong gamot ang inumin mo! Parang magic? Oo, dahil puwede kang bulagin ng isang maling pagmamahal!” seryosong wika ng matanda.

Biglang naputol ang seryosong usapan ng dalawa nang makirinig sila ng sigaw, isang malakas na sigaw!

“MISS PUTIK-PUTIK BAKANG SINGKITTTT!” boses ni Bakang.

Nataranta si Kulaspira, at  dali-dali itong nagbanlaw at nagtapis ng tuwalya, diretso akyat sa dalawang baitang na palwa ng niyog na ginawang hagdan.

“Miss Putik-Putik Bakang Singkittt!” sigaw ulit ni Bakang.

Napailing na lang si David sa ingay ni Bakang. Natanaw na niya ang isang munting kubo na parang tirahan ng aso niya sa bansa nila. Binilisan na niya ang pagtulak sa kariton kahit nabigatan na siya dahil kay Bakang na walang tigil sa kasisigaw.

“Is that Khulasha’s house?” tanong ng lalaki.

“Oh, yes, that her castle, brotheRrr!” sabay nguso sa makapal na labi si Bakang.

Samantala… Hindi alam ni Kulaspira kung ano ang susuotin, muntik na niyang maisuot ang panty ni Lola Basyang; mabuti na lang at nahulog ito. Hindi mapigil ang kaba ng kanyang dibdib, at pinagpawisan siya kahit bagong ligo pa siya.

 “Kulasaaa! Si Bakang yata itong paparating!” sigaw ng matanda.

“Opo! Nagbibihis lang!” sagot ni Kulaspira.

Ngunit, hinalungkat na ni Kulaspira ang lahat ng karton ng Tanduay, ngunit hindi talaga niya mahanap ang panty niya.

“La Basyang, nasaan po ba ang panty ko? ‘Yung inalmironan ko, ‘yung binili ko sa ukay-ukay!” tanong ni Kulaspira sa matanda.

“Ai, naku, apo! Naisuot ko ngayon! Hindi mo kasi nilagyan ng garter yung panty ko!” sagot ng matanda habang nagpapakain ng mga manok.

“La! Ano’ng susuotin ko ngayon?” nakasimangot na tanong ni Kulaspira.

“Apo, ‘yan munang panty ko, may perdible diyan sa may sako, pagtiyagaan mo muna, apo! Bilisan mo diyan at nandito na ang kaibigan mo.  Aba! Sino iyang lalaking kasama niya?” biglang tanong ni Lola Basyang.

Halos maiyak ang dalaga habang nagmamadalingisinuot ang panty ng kanyang lola at nilagyan ng perdible.  Inayos niyang mabuti na hindi mabukas ang lock. Nagsuot na lang siya ng pantalon na hapit para hindi malaglag kung sakaling kumawala ang perdible.

Humarap siya sa maliit na salamin at naglagay ng kaunting polbo na Tender Care sa mukha, sinuklay ang lampas-balikat na maitim na buhok at inayos ang T-shirt na bulaklakin. Simpleng babae, simpleng inosenteng probinsyana, at sa edad niya na 25 years old ay malaking bulas ang magandang hubog ng kanyang katawan.

“Lola Basyangggg!” sigaw ni Bakang.

“Bakang, sino yang kasama mo?” tanong ng matanda.

“David, this Lola Basyang! Lo-La Bas-Yang! Lola Basyang, si David po, kaibigan ko na kaibigan ni Kulasa na iibigin ng apo ninyo!” pakilala ni Bakang.

“Hello, Loyla Bhashang?” pagbigay-galang ni David.

“Helo!” sagot ng matanda.

“David, say LO..LA BAS..YANG!” utos ni Bakang.

“LOYLAH BASHSYANG?” muling bigkas ng lalaki.

“Whatever!” sagot ni Bakang.

“Kulasa, may bisita ka, bumaba ka na riyan!” sigaw ng matanda.

Halos magwala ang dibdib ni Kulaspira at nanginginig ang mga kamay nang buksan ang pintong kawayan. Sa pagbukas niya ng pinto ay biglang natahimik at tulala si David sa isang babae na bumaba sa hagdang palwa ng niyog.

(Itutuloy)

About jovelyn

Im not a good writer but i love to 🙂 Masaya din, Malungkot din (Karanasan ng OFW) this is my first book under my name as a writer and Sindi Ng Lampara OFW stories book with Raquel D. Padilla and DFBI writers, columnist in Pilipino Star Ngayon Middle East [email protected] Super kulit at kalog..proud bisdak at tamad na masipag na yaya:)