TEH! Ano ba ang Latest?

(Photo Credit: Facebook)
(Photo Credit: Facebook)

Mahilig ka ba sa tsismis? Weeeh! Maniwala ako na kahit kailan ‘di ka nakinig o naging interesado sa tsismis.   Sinungaling ka kung kahit kailan ay ‘di ka naging “curious” kung bakit, kailan, saan, paano at sino ang pinag-uusapan lalo na kung exciting o bago ang balita!

Eh, teka…teka…ano ba ang meaning ng TSISMIS?

Ayon kay Mr. Google, “tsismis” or gossip in English originated from the Spanish word, “chisme” na ang ibig sabihin ay “kuwento o pag-uusap na nagpasalin-salin tungkol sa ibang tao o bagay na walang kumpirmasyon”.

Eh iyon naman pala! Mga kuwentong walang kuwenta kasi walang katiyakan kung may katotohanan. Eh bakit masarap patulan? Bakit nakakaadik pakinggan at pag-usapan?

Napukaw ang aking kuryusidad sa usaping “tsismis” nung minsang, papasok ako sa trabaho, isang umaga ng Linggo iyon, may nakasabay akong dalawang kapwa ko Pinay na naghihintay ng tren. Dahil halos katabi ko sila, at  mukhang wala namang silang balak ng gawing “secret” ang kanilang pinag-uusapan dahil sa medyo malakas na palitan nila ng kuwento, ay ‘di ko naiwasan (sumpa man) na marinig ang kanilang usapan.

Ikinukuwento ni Ate no.1 kay Ate no.2 ang tungkol sa boarder niya na may asawa daw sa Pilipinas, pero hinala niya ay may boypren pang iba. Asar na asar si Ate no.1 kasi kasalanan daw iyon at malas daw sa bahay ang may kasamang maduming babae.

Si Ate no.2 naman, panay na panay ang “susmaryosep” at “kadiri” na expression. Nung tanungin ni Ate no.2 kay Ate no.1 kung bakit ‘di niya paalisin sa bahay niya iyong pinag-uusapang boarder, sabi ni Ate no.1, “Eh, hinuhuli ko pa kung totoo. Saka wala pa akong nahahanap na kapalit niya. Sayang yung ibabayad niya sa akin.” Saka ko nalaman na nung araw na iyon eh papunta pala sila sa simbahan at a-attend ng misa.

Gusto kong isipin na masyado lang talagang “homesick” o “bored” sa buhay nila ang mga kapwa Pinoy sa ibang bansa kung kaya´t isa sa paraan ng pagpapalipas nila ng inip o lungkot ay ang kuwentuhan. Pero kung ang kuwentuhan ay lumalabis na at pati ang buhay ng may buhay ay pinakikialaman mo pa, may mali na dito. Lalo na kung walang basehan o katotohanan o kumpirmasyon ang kahit na anong kuwneto ang iyong sasabihin o ikakalat. Hindi masama ang makibalita. Piliin lang sana kung ano ang pakikinggan at papatulan. Hindi rin masama ang magbalita. Siguraduhin lang sana na may katotohanan at permiso nung taong ikinukuwento. Makapangyarihan ang dila ng tao, maari itong gumawa o sumira ng pagkatao.

Ayaw kong isipin na walang pinag-aralan ang mga taong ang hilig gawin ay manira o magkalat ng walang basehang kwento, kung tutuusin, may mga pinag-aralan sila, kasi karamihan ng mga Pinoy na naririto sa ibang bansa, may tinapos kung hindi man, ay nakaabot ng high school. Kung tutuusin, hindi naman kailangan na may pinag.aralan ka, upang malaman mo ang tama sa mali. Bukod sa subject na GMRC  (Good Manners and Right Conduct) – kung may ganyan pang subject ngayon, karamihan sa dapat matutunan ng tao ay sa labas ng paaralan. Para sa akin, KONSIYENSYA  at  TAKOT SA DIYOS (iyong tunay ha!) para mapag-isip-isip mo na ang pagkakalat ng mali at walang katotohanng balita ay masama!

Matthew 12:37 ” For by your words, you will be acquitted, and by your words you will be condemed.”

Proverbs 12:13 “An evil man is trapped by his sinful talk, but the righteous man escapes trouble.”

Proverbs 21:23 “He who guards his mouth and his tongue keeps himself from calamity.”

Napakaraming mas magandang pag-usapan kaysa buhay ng kapwa mo. Kung aburido ka sa buhay mo, huwag ang iba ang pagpiyestahan mo. Kung naiingit ka naman sa ibang tao, huwag mong sirain ang kanyang pagkatao.  Sa halip, pagbutihin mo ang buhay mo para matulad ka sa suwerte ng iba. At kung wala kang sasabihing maganda, mas mabuti pang tumahimik ka na lang kaysa sumira ng buhay ng kapwa mo.

Remember, KARMA is just around the corner!

About Joy Rebanal-Laygo

Residente ng ibang bansa, Pilipino pa rin sa puso at diwa. Isang anak, kapatid, asawa at ina. Walang pakialam sa sasabihin ng iba.