Panawagan sa POEA at OWWA

panawagan(Isang bukas na liham para sa OWWA at POEA)

Ginagalang na Administrador Hans Cacdac at Administradora Carmelita Dimzon,

Isa lamang po akong simpleng OFW, na dumaan sa legal na ahensya at personal na dumalo sa aking PDOS at OWWA Language and Culture Familiarization o Comprehensive Pre-Departure Education Program (CPDEP) dalawang taon na ang nakararaan. Ngunit bilang isa sa libo-libong kasambahay ay sa inyo ay nananawagan ng pagbabago sa lektyur sa dalawang programa na inilunsad.

Alam kong ito ay makapagbigay ng aral at pamilyarisasyon sa isang simpleng OFW sa bansang pupuntahan. Ngunit kung magtatala kayo ng pagsusuri ay paglabas ng isang OFW sa silid na pinagganapan ng lektyur ay wala siyang lubos na natutunan.

Alam ko na iba’t-ibang dahilan kung bakit hindi nagtatagumpay ang isang leksiyon. Maaaring sa interes ng tagapakinig, sa husay ng tagapagbigay ng leksyon, o sa mismong leksyon na ibibigay.

Bilang ako sa sarili ko lamang ay kung babalikan ko ang pagdalo ko sa OWWA training ay ano ang dahilan kung bakit ako hindi naging kumbinsido para makinig?

Una, dahil pagbungad pa lamang ng inyong tagapagbigay ng lektyur ay wala na siyang kabuhay-buhay; kulang ang enerhiya para sa mahigit 100 tagapakinig. Bukod pa roon ay ang patalon-talon na leksiyon at ang halata na pakikipagbiruan sa mga babaeng tinuturuan sa paraang malaswa. Ang pag-aaral ng lengguwaheng Arabo ay hindi basta-basta at hindi iyon matutunan sa loob ng tatlong araw. Ngunit idinadaan lamang niya sa kuwento ang kanyang pagtuturo. Sana isinulat na lamang niya ang buhay niya at mga karanasan sa isang libro para kasabay ng ibinebenta niyang maliit na diksyunaryo. Kasi sa tatlong araw na iyon ay sadyang buhay niya at karanasan lamang ang ikinuwento. Na kung saan ay limitado at halatang wala sa sistema ang sunod-sunod na daloy ng mga importanteng paksa na dapat na mapagusapan o maituro.

Sumunod naman ay ang sa PDOS, sa pagsisimula pa lamang ng leksiyon ay inanot na ng kung ilang oras ang mga tagapagsalita ng mga bangko na nangeengganyo sa bawat OFWs upang mag-impok. Pagkatapos ay ang pagtalakay sa pag-iwas sa pakikipagtalik at ang sakit na AIDS na susundan ng pag-aalok ng isang pakete ng mga gamot na siyang “Safe” raw kung tutuusin sa bawat OFW na dalhin sa paliparan. Ano ang maaari at hindi dalhin sa paliparan. At ilang bagay na sa tingin ko ay kulang para sa kaaalaman ng isang OFW.

Maaari ba akong magbigay ng ilang paksa na dapat na maidagdag sa inyong mga Training para sa mas pagpapalawak ng kaalaman ng bawat OFWs lalo na ang mga kasambahay na siyang maraming bilang ng mga umuuwing minamaltrato at tinatanggalan ng karapatan-pantao.

1. Pagpapalawak ng impormasyon at kaalaman sa REPUBLIC ACT NO. 8042 Migrant Workers and Overseas Filipinos Act of 1995

2. Kaalaman, proseso kung paano at sino ang maaaring magamit ang REPUBLIC ACT No. 10022 (AN ACT AMENDING REPUBLIC ACT NO. 8042, OTHERWISE KNOWN AS THE MIGRANT WORKERS AND OVERSEAS FILIPINOS ACT OF 1995, AS AMENDED, FURTHER IMPROVING THE STANDARD OF PROTECTION AND PROMOTION OF THE WELFARE OF MIGRANT WORKERS, THEIR FAMILIES AND OVERSEAS FILIPINOS IN DISTRESS, AND FOR OTHER PURPOSES)

3. Pagbibigay ng mga eksaktong pangalan at tao na dapat kontakin sa embahada at POLO-OWWA sa bawat kaso o problema na kinakaharap kung saan hindi lamang puro numero ng hotline ngunit ipapasalin-salin ang tawag ni OFW ngunit wala naman natamong solusyon sa suliranin na kinakaharap. Magkaroon ng bihasa na tagapagsagot ng mga katanungan ng OFWs sa mga ibinigay na numero kung saan ay hindi naman nakakatulong.

4. Pagturo ng proseso sa bawat batas at kaparusahan sa mga paglabag sa bansang destinasyon ni OFW.

5. Pagturo ng paraan ng pagrereklamo sa bawat tanggapan ng gobyerno ng isang bansa at kung paano ito maisasagawa. Ang bawat hakbang na unang gawin kung sakaling hindi siya pinapasahod, sinasaktan o kaya ay may kawalanghiyaan na ginawa ang kanyang employer.

6. Pagpapaunawa sa OFW ang mga karapatan na mayroon siya at ang hindi pag-abuso nito.

7. Pagpapaintindi sa bawat OFW ng nga benepisyo ng OWWA sa bawat pagbayad niya ng kanyang membership.

8. Pagaasiste sa OFW ng kahalagahan ng balik manggawa at ano ang mga kinakailangan dokumento sa pagkuha nito.

9. Pagbibigay impormasyon sa kung paano magagamit ang pagigimg miyembro sa SSS, PAG-IBIG at PHILHEALTH na compulsary na binabayaran ng isang OFW.

10. At habang isinasagawa ang PDOS ay tiyakin na maisa-isa ng isang tagapagbigay ng lektyur ay may legal na kopya ng kontrata ang isang OFW. Pirmado ng employer at manggawa at Iyong pinakabalidong kontrata na naaprubahan na ng POEA at OWWA. Tiyakin na sa pag PDOS pa lamang ay may siguradong sariling kopya ang bawat OFW. At maipaintindi at pagtuturo ng dapat na gawin kung sakaling may pagpapalit ng kontrata sa bansang pupuntahan na sadyang taliwas sa pinirmahan at pinagkasunduan bago pa umalis ng bansa.

11. Maliwanagan sa Repatriation procedures at kung sino lamang ang maaaring magkamit nito at paano ang proseso.

Bukod pa sa pagtalakay ng mga mahahalagang kaalaman ay imulat ang bawat OFW ang kalalabasan ng maling aksyon tulad ng pagtakas sa itinakdang amo at hindi kaagad nakipagugnayan sa embahada o POLO-OWWA.

Kung sakaling dinggin ninyo ang aming panawagan ay tinitiyak namin na maraming OFWs ang hindi mangangapa sa kung ano ang dapat niyang gawin sakaling magkaproblema sa bansang pupuntahan.

Lubos na umaasa at gumagalang,

Sylvia Hermitanio

in behalf of all OFWS