Baboy

Images by SBA / geralt via Pixabay

Sa bawat takip-silim at ang tulog ay magiging mahimbing

Isang impit na palahaw at palihim na daing

Aking sasapitin sa kanyang piling

Tititigan ang katawan ko; mata niya’y ‘di maibaling.

 

Bibig ko’y impit sa bawat malaswang tingin

Mula dibdib hanggang binti ko’y hinahalikan niya sa hangin

Gusto ko mang sumigaw na huwag akong lapastanganin

Ngunit tingin sa aki’y katatawanang dapat lang lisanin.

 

Awa sa sarili ang tangi kong nararamdaman

Dapat ba akong ituring na katatawanan?

Ako’y mataba, baboy sa tingin ng madla

Bastusin man nila ako’y wala rin daw silang mapapala.

 

Sinong maniniwala kapag ako’y nagsuplong?

Sabi nila katawan ko’y balyena; sino ang magtatangka?

Pagkababae ko’y nababoy ngunit ako’y pinagtawanan lamang

Wala raw magnanasa kaya ito’y akin lamang sapantaha.

Image via Pixabay

Sapagkat ako’y pangit at mataba, wala raw magtatatangkang mambastos

Kaya kapag ako’ hinayop, walang maniniwala pagka’t ako’y busabos.

Wala nga bang karapatan na ang luha ng tulad ko’y umagos

Dahil ako’y binastos at tinuring na busabos?

 

Mundong mapanglait, kailan ka makikinig?

Tatahimik na lamang ba ako sa gilid?

Wala nga ba akong karapatan dahil sa hitsura kong ala saguiguilid?

Isa nga lang ba akong katatawanang isinuka ng langit?

 

Ayan muli ang malalaswang tingin

Sana’y tangayin na ako ng hangin

Palapit siyang unti-unti sa akin

Ano mang oras handa akong dakmain.

 

Kita ko sa mata niya ang matinding pagnanais

Unti-unti, ramdam ko ang kanyang pagmamalabis.

Sa dapit hapon ako’y lumuha nang tahimik

Pagsaksak ng punyal, mata niya ay tumirik.

 

 

http://www.sba.ph/

Be the first to comment

Leave a Reply

Your email address will not be published.