Pagpapatawad

Kuha ni Charina Clarisse Echaluce

Madali lang ang patawarin ka. Alam ko, dahil mapagpatawad ako. Madali lang, lalo’t mahal kita. Madali lang, dahil nakasanayan na.

Ngunit hindi pala madali ang muling magtiwala. Pagkatapos ng pagpapatawad, humihiwalay pala ang pagtitiwala. Silang dalawa, parang naging mga dulo ng sinulid na nag-uunahang pumasok sa maliit na butas ng karayom.

At nauna ang isa. Nauna ang pagpapatawad. Napatawad na kita, napatawad ngunit hindi na mapagkatiwalaan.

Kapag magkasama tayo, hindi ko na makita ang langit, nang bughaw at malinis. Sa bawat paglubog ng araw, sa tabi ng dagat, ang nakikita ko na lamang ang ubod ng pulang silahis – animo’y dugo na lumalason sa katubigan. Sa ilalim ng mga tala, hinahanap ko palagi ang kometa; na masamang pangitain daw ngunit hangad kong makita, katulad ng paghahanap ko sa mga lihim na ibubunyag mo pa o ng tadhana.

At habang naglalakad tayo sa bangketa, hindi ko lubos mahawakan ang iyong mga kamay – nangangambang bigla ka na lang bumitaw kinabukasan. Ayaw kong maalala kung paano mo hawakan ang kamay ko; baka bukas o sa makalawa, kapag bigla kang nawala, ay hanap-hanapin ko sa alaala.

At kapag nagpapaalam ka bago ko isara ang pinto ng aming bahay, ngumingiti na lang ako para ngumiti ka rin. Ngumingiti ako para ngumiti ka rin. Para kung bukas ay hindi ka na makita, isang nakangiting ikaw ang aking maaalala.

Nawalan man ako ng tiwala sa pag-ibig na nagtatagal, hinding-hindi ko makalilimutan ang nagdaan; totoo man o hindi ang ating nakaraan.

Hindi ko makalilimutan ang bughaw na langit noong pawiin mo ang sakit na aking nararamdaman. O ang paglubog ng araw na dahilan ng pagsikat nito para sa ating dalawa. O ang mga tala, na noon ay inakala kong nilikha para sa ating dalawa. Maging kung paano mo hinawakan ang akin kamay, sa kauna-unahang pagkakataon; maraming daang taon man ang magdaan, lumipas man ng ilang beses ang buhay.

Nawala man ang paniniwala ko sa pag-ibig na nagtatagal.

Nawala man ang pananalig kong may tunay na pag-ibig na naghihintay.

About Charina Clarisse Echaluce

Charina Clarisse Echaluce is a journalist by profession and a literary writer by passion. She had her first novel published at Balita newspaper, from 2013 to 2014. She is the owner of Minsan Okay Lang Ma-traffic Facebook page and the author of Minsan Okay Lang Ma-traffic book. Other pages: http://minsanokaylangmatraffic.wordpress.com/ http://www.wattpad.com/user/CINDErainLLA http://twitter.com/OKLangMatraffic http://instagram.com/trafficinwords2016
Do NOT follow this link or you will be banned from the site!