Light Switch     (Photo Credit:    Elenaphoto)

Light Switch (Photo Credit: Elenaphoto)

Kuya, ano yang hawak mo?

Switch ng ilaw.

Para saan yan? Project mo sa masteral?

Wehhhl! Walang ganito sa masteral.

Oo nga pala, MaEd ka… Para saan yan?

Naalala ko lang ang prof ko nung college… binigay niya sa akin ito. Titigan ko raw. Tinitigan ko naman. Tinanong niya ako ano raw napansin ko. Sabi ko pag pinindot ko ang button sa ilalim, uulwa naman sa itaas. Kinutusan ako ng prof ko. Ang babaw ko raw mag-isip.

E! Dapat ginantihan mo. Siya pala ang mababaw mag-isip, natural yun naman talaga ang napansin mo.

Loko, baka bigyan ako ng tres nun. Tapos pinatitigan niya uli sa akin. Sumuko rin ako. Matapos niyon, hinawakan niya ang buhok ko, ginusumot, parang bata akong nilalambing ng isang ama. Bigla na lang pumatak ang luha niya. Hindi ko alam kung ano ang magiging reaksiyon ko. Tinalikuran niya ako at naiwan naman akong naguguluhan.

Ilang beses mo nang tinititigan yan, siguro naman alam mo na ang dahilan kung bakit binigay sa iyo ng prof mo yan?

Basta ang alam ko malalim ang kahulugan ng switch na ito sa prof ko. Bago niya ako talikuran, sinabi niya sa akin na malalaman ko lang daw ang lalim ng isang bagay kapag naging malalim rin ang karanasan ko rito. Kung titingnan ko ang surface, switch lang daw iyon, pero kung papasukin ko raw ang kaloob-looban niyon, doon ko raw malalaman ang lalim ng isang bagay. Ewan ko kung para saan ang switch sa buhay ng prof ko, basta sabi niya sa akin noon, may anak siya…

***

Muling pinindot ni John ang switch, umulwa ang ibabaw na button, narinig ang maikling lagitik, kasabay niyo’y nagliwanag ang kaniyang isipan.

Enhanced by Zemanta